Surah At-Takwir in mdh

إِذَا ٱلشَّمۡسُ كُوِّرَتۡ

Amayka su senang ka malimumu (kaawan na sigay).

وَإِذَا ٱلنُّجُومُ ٱنكَدَرَتۡ

Endu amayka su manga bitun ka mangalubpug.

وَإِذَا ٱلۡجِبَالُ سُيِّرَتۡ

Endu amayka su manga palaw na makabayug,

وَإِذَا ٱلۡعِشَارُ عُطِّلَتۡ

Endu amayka su manga magingay a manga unta ka madtimatag (da den mamarihala lun).

وَإِذَا ٱلۡوُحُوشُ حُشِرَتۡ

Endu amayka su manga mayla a manga binatang na matimu.

وَإِذَا ٱلۡبِحَارُ سُجِّرَتۡ

Endu amayka su manga lagat na pakalegen.

وَإِذَا ٱلنُّفُوسُ زُوِّجَتۡ

Endu amayka su ngiyawa ka padtagapedan (kanu lawasin/badanin).

وَإِذَا ٱلۡمَوۡءُۥدَةُ سُئِلَتۡ

Endu amayka su wata a babay (a inilebeng sa bibyag) ka kaidsan.

بِأَيِّ ذَنۢبٖ قُتِلَتۡ

Endaw i kadusan a sabap a kinabunu lun?

وَإِذَا ٱلصُّحُفُ نُشِرَتۡ

Endu su manga lukisan nu manga galebekan ka makapayapat.

وَإِذَا ٱلسَّمَآءُ كُشِطَتۡ

Endu amayka su langit ka mabaluba.

وَإِذَا ٱلۡجَحِيمُ سُعِّرَتۡ

Endu amayka su naraka na pasindawn.

وَإِذَا ٱلۡجَنَّةُ أُزۡلِفَتۡ

Endu amayka su surga na isiken (kanu pakasulga).

عَلِمَتۡ نَفۡسٞ مَّآ أَحۡضَرَتۡ

Katawan den nu isa a ginawa su nganin a nanggalebekin.

فَلَآ أُقۡسِمُ بِٱلۡخُنَّسِ

Saben-sabenal na ipedsapa ku kanu manga bitun (egkadadag u mapita su sigay nin na egkaliwanag u magabi su sigay nin).

ٱلۡجَوَارِ ٱلۡكُنَّسِ

Su manga bitun a pendalaguyan sya kanu lalanin a pakapagena.

وَٱلَّيۡلِ إِذَا عَسۡعَسَ

Endu idsapa ku kanu magabi amayka egkalibuteng.

وَٱلصُّبۡحِ إِذَا تَنَفَّسَ

Endu idsapa kanu mapita amayka egkaliwanag,

إِنَّهُۥ لَقَوۡلُ رَسُولٖ كَرِيمٖ

Saben-sabenal na su Qur’an na kadtalu a inipadtalu kanu sinugu a mapulu (Jibril).

ذِي قُوَّةٍ عِندَ ذِي ٱلۡعَرۡشِ مَكِينٖ

Aden lun i bagel a katinggiyan nin lu kanu bamarihala kanu Arash.

مُّطَاعٖ ثَمَّ أَمِينٖ

Balityalan (nu manga malaikat lu sa langit) ataw ka kasaligan.

وَمَا صَاحِبُكُم بِمَجۡنُونٖ

Endu kena man buneg su tagapeda nu.

وَلَقَدۡ رَءَاهُ بِٱلۡأُفُقِ ٱلۡمُبِينِ

Endu saben-sabenal a nailay nu Muhammad si Jibril sa kawang-kawangan sa mapayag.

وَمَا هُوَ عَلَى ٱلۡغَيۡبِ بِضَنِينٖ

Endu di nin ebpaningit su kataw makapantag kanu di nin gangailay.

وَمَا هُوَ بِقَوۡلِ شَيۡطَٰنٖ رَّجِيمٖ

Endu su Qur’an na kena kadtalu nu manga shaytan a berajamen.

فَأَيۡنَ تَذۡهَبُونَ

Na endaw kanu pan ebpawang?

إِنۡ هُوَ إِلَّا ذِكۡرٞ لِّلۡعَٰلَمِينَ

Dala kanu Qur’an ya tabya na patadem kanu sakalyan alam.

لِمَن شَآءَ مِنكُمۡ أَن يَسۡتَقِيمَ

Kanu entayn i nagkahanda ebpun sa lekanu sa kadtinudtuan

وَمَا تَشَآءُونَ إِلَّآ أَن يَشَآءَ ٱللَّهُ رَبُّ ٱلۡعَٰلَمِينَ

Endu na da magkahanda nu ya tabya na egkahanda nu Allah a pedtiyakap kanu sakalyan alam.